Merinok eta Lizardik final handian bizitakoa ahaztu ezinik jarraitzen dute
Merinok eta Lizardik irabazi zuten Nesken Xistera Zirkuitua, Markina-Xemeinen jokatu zen final handian Aldazabal eta Calvo 2-0 mendean hartuta.
Eneritz Lizardirentzat bigarren finala zen. Iaz ere jokatu baitzuen, nahiz eta ez zuen irabazi. Bere ustetan, biak ere tankera handia izan omen zuten. “Ez dut uste gehiegi aldatu denik, nire sentsazioak tankerakoak ziren. Markina-Xemeingo pilotalekua handia da, eta horrenbeste jenderen aurrean jokatzeak zirrara berezia egiten du´´, esan zuen.
Naroa Merinorenzat lehen finala zen, eta urduri samar kantxaratu zela esan zuen. ´´Hasieran urduri samar kantxaratu nintzen. Behin irabazten hasi ginenean, indarra eman zidan, konfiantza hartu nuen, eta gero lasaiago aritu nintzen´´, esaten du aurrelari tolosarrak.
Izan ere, finalaren aurretik ez omen zeukan irabaziko zuenaren itxaropen gehiegi. ´´Urduri nengoen, eta ez nuela irabaziko uste nuen. Gero, finalean gauzak ongi egin genituen, eta indarra eman zidan´´, aitortzen du Naroak.
Eneritzen esanetan, bi bikoteak kantxaratu omen ziren urduri. ´´Nik uste dut lau pilotariak atera ginela urduri. Partidak aurrera egin ala, lasaitzen joan ginen. Lehen jokoa irabazi egin genuen, eta horrek nolabaiteko lasaitasuna eman zigun´´, esan zuen atzelari mutrikuarrak.
Lizardiren ustez ez omen zen aparteko gakorik egon finalean. ´´Nik uste dut ez zela gakorik egon. Guk garbi geneukan nik jarraitu egin behar nuela atzean ematen, eta aurrean Naroak aukera zuenean amaitu. Gauzak ongi atera zitzaizkigun, eta amaieran poz handia izan zen´´, adierazi zuen Lizardik.
Txapelketa bera ez omen da izan erraza Merinorentzat. ´´ Hasieran ez nintzen ongi hasi. Galdu egiten nituen partidak, eta horrek kezka sortzen zidan, antsietatea ere bai, baina behin lehen garaipena lortu nuenetik, gauzak hobetzen joan dira, eta oso gustura amaitu dut txapelketa´´, dio Merinok.
Lizardi gustura geratu da orokorrean egin duenarekin. ´´Ni gustura geratu naiz egindako txapelketarekin, baina ez horrekin bakarrik, baita nesken zesta punta gora doala ikusteak ere poz handia ematen dit. Horren atzetik lan asko dago, jende asko ari da lanean. Hasi nintzenean ia neskarik ez zegoen, eta orain horrenbeste ikusteak sekulako poza ematen du´´, esaten du Eneritzek.
Finalean bizitako giroaz ere gustura mintzatu ziren biak. ´´Frontoia horrenbeste lagunekin ikustea handia da, dena beteta ikustea izugarria, normalean ez dugu horrenbeste ikusleren aurrean jokatzen, ez gaude ohituta, eta horrek nolabaiteko presioa sortzen dizu, baina gustagarria da´´, adierazi zuen Merinok.
Orain, etorkizunari aurpegian irrifarrea duela begiratzen dio aurrelari tolosarrak. ´´Honelako final bat irabaztea izugarria da, eta aurrera egiteko indar handia ematen du´´, esaten du Merinok. Egoera beretsuan aurkitzen da Eneritz Lizardi ere. Hasi aurretik esan zuen iaz ez zuela irabazi eta aurten garaipena lortzea egokitzen zitzaiola, eta helburua beteta, mutrikuarra ere oso pozik dago.